PUZO

Thu mapuui:Lungdamna thu kici a-op lam ithei cien leh, dana thuzong alang khat ah omhi cithu kithei pai aa, tam lungdamna thu heipan ang
kipan aa, heisung cieng huom ahei? cizong thei ding akisap ma bangin dana kici zong heipan ang kipanh aa heicieng huom ahei cizong ithei cien ding un kisam hi. Tua ziekin lungdamna thu kici inh bang ahei? Cithu ikikum ding uhi.

Dahuoi na ahi Sina ( dead ) ang pien khiet na: Pasien in leitung vantung le asung aa omteng nasiem masa hi. Piencil: 1:1- 25. Asiemsa bupi zosie akem akhoi dingin ama meel sunin mihing ei nasiem kia hi. Piencil.2: 7,22 Tambang teng tawh PS ii asiem mihing Adam le Eve in PS thukham palsan ahi ziekin, tuo ni aa patin dana akici sina le tu aa ithuohthuoh, inawknawk uh hamsat nate zosie ang om to-aa, tuo pen sina ( dana ) ang pien khiet na ciding hi. Piencil. 3:6-7.

Lungdamna thu ang pien khiet na: PS siemsa mihing te’n thukham ipal san ziekin mihing te tung ah sina cithu dahuoi tahin ang pien ciengin, kanto leih, PS in sina athuoh ding asiemsa mihing te it ahi ziekin agum khieding in, ata pa Zeisu leitung ah ang sawl suh hi. John 3:16. Zeisu in leitung ah kum3 dingbang mihing limla in ang om aa, atawp na-ah sina sung aa om mihing zosie in hInna anga thei nading in singlamte tungah ahin na pie in sina ang thuoh inh Lungdamna thu angpien khietna hi.

Lungdamna akici nam 2 thu: Lungdamna thu kici inh nam 2 in na-om aa, Proclamation ci’n kamtawh taangko, teci pang, gen kawikawi Jerusalem pan lei mong khat dong ah. Mt. 28:19, Mk. 1:14-15. Act. 2:38. namkhat pen sepna tawh taangko, teci pan na ( Service ) kici aa, social welfare lam ahihi. Tam service citawh kisai in Lst genna pawlkhat i-en ding uhi. Zeisu mama in dawi te nahawl, cina nadam sah, gilkiel te an nava cidan aa social lamtawh kisai asep na tawh taangko na service imu thei hi.“ Gil kiel aa ka-op lai tahin an nei pesih ua, puon nei lo-aa ka-op lai tahin silding puon nei pesih ua, thong sungaa ka-op lai tahin nei ve sih ua, damlo aa ka-op lai tahin nei ve sih uhi” naci hi. Tam pen taksa lam mama kikep kihuoi, kihepi, nading lam agen naa, sepna service social welfare ahihi. Mk.1: 41- 42, 6:41-42, 1 Mt.25:35,42, Act.16:18, James.2:14-18

Lungdamna thu ci tawh kisai, tu ni imi te ii sanzie le sepzie: ZBA G/S Rev. Kai Khan Lien inh, imi te’n Mt 28:19 na pen  kibultuh hina pi’n, tuosung aa “vak kawikawi unh” aci pen beh kibek pom lien in, kipek va sieng key in, “hlamangthang matding cile Pa, Ta, Hlasiengtho tawh nathuiphum unh” aci athupi zaw pen anuosie dantawh ikibang ta uhi” ci’n gen ngaih hi. Maan / maan lo cipen, hlamangthang bangza iman ta vuoi ci enleih kithei pai lien ding hi. Gentena: Yangon ah pawlpi phu zo nading in, ihanciem ua, honpi khat zong iphut zo takpi uhi. Malaysia ah imite biekpieh na mun 7 bangah ineih uhi. USA ah zong 3-4 bang ineih uhi.Dawibie/milim bie te bangza iman zo ta vuoi? Cithu in a result hiding hi. Tua hilo, thuzuimi ahisa, pawlpi khat sungaa lungmuong no-aa omsa, nga ( fish ) hileh ngakui sungaa om sa ahi nga (fish ) te gu in, ngakui dang khataa hlei kawikawi aa kitahla natawh halmangthang man aa kipulaklak te ihi lai kha vuoi?

Lungdamna thu tawh hlamangthang man:  Malaysia aa Pawlpi tele Pastor te nasep khat igen ding uhi. Kum 2008 sung pawlpi khat ii ministry nasep kumkhat report na-ah dawibie/milim bie kawlgam mi mimal 71 te Christian suoh sahin tuiphum na neih uhi. US dollar teng zabang za citawh zong kilei zolo ding guolzaw na nga uh aa, apawlpi sunguh lungdam na awging in thawn hi. Amau te’n “underground mission” ci uhi “Hlanmangthang manlo pawlpi in asii pawlpi hi” aci thu bulphu in thugen naa, thalak naa le lungdam kona nei uhi. Tam pen lungdamna thu kamtawh taangko ( proclamation ) natawh hilo in, migen thei te sui tangtang in sepna tawh ataangko, teci apanna panun amat uh hlamangthang te ahihi. Sen gamah tu aa za-aa Christian angtam nading in, kamtawh taangko na pan himasalo in, social service sepna tawh ang kipan cileih kikhiel lo khading hi. Tawngpai Chin lamah tu aa za aa PS lam hileh taksa lam hileh ang khanto thei nading un, milimbie kawlkumpi te sep hilo in, CCOC te sepna pan hi cileih kikhiel lo khading hi. CCOC te akipat cilun kitongsan thei lo hima uleh sepna tawh taangko, teci ang panh ciengun, tu aa za khantona ang pieng toto hi cileih kikhiel nak khollo ding hi. Sawltak te ii lungdamna thu gen le teci pang in, PS theilo te PS theisah in, thuzuimi suoh sahin Pa, Ta, Hlasiengtho tawh na tuiphum ua, tuo teng kipawl le kikhopton thei nading in pawlpi naphut uhi. Ei pawl aa enleih,1975 zaw pawl aa patin lungdamna thu / gupnathu khahlaw na igam ah angtung aa lungdamhuoi ahi zui-in alang khatah lungdamna thu  namsau tawh pawlpi satkek angtam mama ahithu  dahuoi takin imu uhi.Pastor, Pawlpi Upa kahi akici pawlpawl khatin pen luumuhgyi, Social welfare cite kei nasep hisih ici zieu thei omlai ihi ziekun adahuoi  lai ciding hi.Biekna kici inh mihing te ding hi aa, luumyhgyi kici zong mihing te ding ma hiveve aa, naingangyi kici zong mihing te aading ma ahilam tah atel siem lo ihi
khading vuoimah?  Ci ngaisut siem kia huoi ding hi.

Hing ( life ) gigua inh si ( dead ): Hlamangthang amanlo ipawlpi inh asii hi aa, hlamangthang amanlo ipumpi inh ahin hangin asii ma hi aa, hlamangthang amanlo hauhna inh  asii ma ahihi. Asepzo ding/ asep thei ding hunaa PS dingaa asem lo thuzui pa inh, siding ngakaa lup natung angtun tak ngeyngey ciengin,  “ Si a khut guoh ma suon kawm in ei Tanpa mai ka mu ding, Mawk na tawh ka tawp sah  kum teng la kia thei hi leng, A un sieng ka To pa pie in ama deih dan in mang sieng vang” ci’n la naphua hi.ZBA hymn 271. Nang le kei inh sep thei ding hun inei
lai ziekun ihampha uhi.

Dawhna le dawnding thu3: Daacieng in vantung thukhenzum mai ah itung ngeyngey ding ua, tua ni ciengin thukhen Mangpa Zeisu in, ei Pastor le
Evangelist kahihi akiciteng eihlan masa le eidawh masah ding thu inh, Pastor kum bangza nasem? Pawlpi bangza naphut? Pawlpi kipawl napan hlasum bangza nasang? US dollar bangza nakhol? Cite ang hikhol dingaa, eidawh masah ngeyngey ding thu3 inh…1). Napawlpi kipawlton natawh Hlamangthang bangza naman? 2). Nangma ma pei in hlamangthang bangza naman? 3).Kangpiehsa sum le paai te sawlin hlamangthang bangza naman?

Dawnna:……bang icidawn ding vuoi?

Thukhup na: Lungdamna thu kici inh: Tua ziekin, Spiritual welfare lam kamtawh taangko, teci panna ( proclamation ) cile Social welfare lam
ahi mizawng migenthei mitasam, meigong taga gilkiel dangtaa te hu, panpi ci sepna ( service ) tawh taangko, teci pang in, lei omgkhat pan
mongkhat dong ah vakkawikawi aa hlamangthang matna inh “Lungdamna thu” kici hi. Zo tate i-op naciet panh kipawlton natawh  “hlamangthang aman
dingin”  Pasien inh thupha ei peta heh. Amen.