Mihing hinkhuo ah sum le pai a thupi ma ma a, sum lo in kihing theilo hi. Tuaziehin, mizosie in sum kidei cieta, pawlkhat in sum deigaw ta sengin lungsim kisietlaw va ia uh hi. Mihingte a ding in bang hun cieng sum a kicing thei diei ci pen genha ma ma hi. Gentenakhat ah “Pasian in sum pen a kicing theilo mawng mawng dinga a na bawl a hi” a kici ma bangin leitung ah mihingte sum le pai kiningcing ta ci omthei lo hi. Sum tam nei ten’ tam dei tasem, a tawm nei ten’ tam a nei thei na dingin hakat tah in nasem uh hi. Tuaziehin, sum le pai tung ah ih tel siem ding thuthuh leh thuhoi ma ma te om hi.
Hausatna: Tampen mikimin ih deiciet uh leh ihtupciet pen uh a hi hi. Bible in hausatna pen Pasian thupha in a na gen hi. Hinan leh tam hausatna thu gen ding thu (2) om hi.
(A)Pasian dei hausatna: Mi tampi lungkimna leh deina, koima subuoi lo a sum muna leh neina, sepna bawlna khat po po ah gensiet bei muna lamna te Pasian leh mite lungdamna ahi leh tua hausatna pen Pasian deilam ci ding a hi hi.
(B) Tam atunga ih gente tawh a kituohlo sum leh pai nei leh lam te pen Pasian dei hausatna hilo ci ding hi va.
Christiante leh sum: Christian hinkhuo ah sum tampi nei a hausat ding Jesun’ ei na hil lo zaw in thumaan thudih tawh gamta a Pasian deilam bawl dingin ei na thuhil zaw hi. Jesu hun in sum na kizang zo thamta hi. Hinan leh Jesun’ sum deigaw lo ding in ei na hil zaw a, tambanga hausa ding in zong ei na hil lo in Pasian gam leh a dihtatna sui dingin ei na hanthawn zaw hi. Tuaziein, ei Christian te dingin sum sang in Pasian thu leh la lamah kin masah phot ding hi zaw hi. Tua hi leh, a dang ih kisapna te a man ei pie ding hi.
Zotate leh sum: Zo tate dingin sum thupi dieh dieh leh kilawm hi. Aziehpen, ih hinkhuote uh ngiemluo, pilna kineilo luo, minei milam bang kinei zolo, kilamzolo hi. Tambang silte a om theilo na dingin sum neiphot hauphot kisam hi. Hinan leh ei ma dei bangin ki hi thei lo hi. Tuaziehin, sum leh pai kisam ki deigawciet, hinan leh ki nei thei lo ki nei zolo hi. Tamthute ih theisiem sih uh leh sum deigawna nasie luo in:
1) Khangnote hinkhuo ah pilna siemna sui ding laitah in sum deigawna zie in pilna siemna sinlai tawpsan in gam dang ah va pei ta uh hi. Nu le pa ten’ zong tuabang a sum sui ding in pha ih sahpi uh hi.
2) Nupa tuni a kitengin a zingcieng a sum sui dingin zi leh tate nuasiein ki kuon doh hi. Tamthu in innkuon sung nopsahna leh ki itna susie thei hi.
3) Ta leh nau pantah to ding nei in a pa in zi leh tate nuasie a mungamlapi zinsan cite, tambang dan in ih ta te pen pa –it na kisam in ang gol ciengin hoilona tampi pieng zaw a, a hoikia na ding in sum in siempha zo nawnlo hi.
4) Sum deigawna ziein a thupi ma ma a hi Pasian nasep te kidau bawlta hi.
5) Sum deigawna zieh in thuman thutah zong kikhentel thei nawnlo in ki om ta a, tua mi in ki hazatna, kiengsietna leh hoilona tampi piengsah hi.
Tuazieh in, sum pen a vang nei ma ma hi a, Pasian piehte in a nei thei a hi bo a, ei pumsuithaw thu zong hilo in, Pasian lemsah hun a nei ding ih hi zaw hi. Pasian piehun a a ih nei tah ciengin ih kep siem ding zong kisam ma ma hi. Ih kep siem sih leh ih mansua kia lel ding hi.
Source: ZOKuomthawn Bulletin (August, 2009)
| < Prev | Next > |
|---|
