PUZO

August 16 ni Bible Sunday: Tukum 2009 a dingin Bible Sunday pen August 16 ni hi. Kawlgam ah pawlpi zosie in tami ni in Bible Sunday thupi tah in ki bawl ciet hi. Bible cipen Greek ham in “biblia” laibu te ci a hia, Mang hamin “Bible” ci a hi. Bible ah Thuhunlui bu 39 leh Thuhuntha bu 27 agawmin 66 pha hi. Bible bu 66 te a at hun pen kum 1500 bang sawt hi. Thuhunlui tawpna Malachi leh Thuhuntha patna a at hun pen kum 200 bang kihal hi.

Bible bu 66 te pen a at mi 36 bang pha uh hi. Amau te muntuom gamtuom a om uh hi a, khat le khat kithei khalo uh, a lai at hun uh zong kibang lo, pilna nei oma, pilna neilo zong om uh hina pin’ Bible 66 te pen a ‘tupna’ kibang a, “Hutdamna/ hagau hutdamna” ci a hi. Thuhunlui sung ah mihing mawna leh danpiehna thu agen a, Thuhuntha in mawna dan pan suatat thei na dingin Pasian nasep dan agen hi.

A lamdan na ah lai at mi 36 te in kum 1500 sung a at uh pen khat le khat kikungkai ciet uh hi. Ham kibanglo,lai at ciet kibanglo, mun kibanglo laibu honkhat kaikhawmin sim lei tua laibute a tupna leh ngimna uh kibang ngeilo ding hi.

Bible a bu a nei dan pen kum zalom 2 lai in Latin ham tawh Bible na kilee zo a, “Vulgate” ci ahia, Greek ham Septuagint (LXX) pan a leekhiet a hi hi. Kum zalom 8 pat lamin Mang Laisiengtho Psalm (Lapite) bu beh na nei vua, AD 870 in British kumpi Alfred in micinin Bible a simthei ding uh deina in Bible ang bawl a, kum 1170 in khatvei entha kia uh hi.

Mikimin Bible a simthei na dingin Bible Society ci ang ding doh a, United Bible Sociey of USA (UBS), Bible Society of India (BSI) leh Bible Society of Mynamar (BSM) cite ang ding doh hi.

Kum 2000 leitung misimna ah leitung mi phaza pen 6,055,049,000 (Million tul 6 leh 55 val) hi. Christian 1,999,566,000 (Million tul 1 leh 999 val), Muslim 1,188, 240,000, Hindu 811,337,000, Buddhist 359, 982, 000, Sikhs 23,258,000 leh Jews 14,434,000. Tamteng ban ah Million 1661 val te pen biehna tuamtuom te a hi hi. Leitung ah mi 6 ciengin Christian 2 beh kipha giap hi.

Bible Society te in kum 2000 kum sungin Bible Thuhuntha bu Million 110, Thuhunlui le Tha bu Million 70 te hawmkhie uh hi. Bible simte in Hagau Siengtho nasep theina in a lungsim uh kikhelin piengtha zieh zieh uh hi.

Lungtangnat Ngahlona ding Tampi pia:

Canada thusuite in a genna ah pongman a exercise ih bawlden leh lungtang natna pan ei dal hi ci uh hi.Pasalte sangin numeite in lungtangnatna ngah zaw uh ci uh hi. Gamkhangto te ah kumtam nupi papite in lungtangnatna leh sikhangnatna tawh a kipel thei na dingun keset te hongin lamgei leh munawngte ah lamna tawh pumpi exercise bawl uh hi. Kum tamzaw cienga bangma pumpi piana (exercise) bawlo a, innsunga mawom te ding in lungtangnat leh sikhangnatna ngah bai uh hi cin gen uh hi.

Ban (Bank) Tampi Kikhah belap:

Leitung sum le pai kielpi (Global Financial Crisis) ziein leitung ban thupi leh golpi te kikhah belap zel hi. Kum 2008, January- April ha (4) sungin ban golpi 25 kikhah hi. Kum 2009 kumpat lam ha (4) sungin USA a ban 25 kikhah hi. (Ref: Weekly Eleven)

Attatica ah Vuakhal te Zul Sem Sem:

Leilu lam a vuakhal te pen khuohun lum kibelap ziein tuisuoh in zul uh ci in New Zealand mipil ten gen uh hi. Tami leilu lama vuakhal te pen 1996 kum sangin 75% beisuh zaw in penle tuipi (sea level) ang khang hi ci in Victoria University a thusui professor Peter Barret in gen hi. Aman a gen belapna ah kum 2100 ciengin tuipi maitang Centimeter 80 pan Meter 2 in kato belap ding ci hi.

A H1 N1 (Voh Natna) Vei Mi Kibelap Zel:

Tuni dong cieng leitung gam tuom tuom a vohnatna kibelap sem sem hi:

Vietman ah 620, Malaysia ah 1219, Lao ah 156, New Zealand ah 13 si, Thailand ah 65 si, Japan ah 5000, Brazil ah 64 si, Europe ah 26513, USA ah 40671 leh Indonesia ah 600.

Kumsau Dammi Kibelap Zel:

Japan gam ah kum siel Sepetember ni 15 ni in kum 100 upa te patawina leh pienni silpieh te piehna bawl den uh hi. Tampen 1963 kum apat a pat doh uh hi a, tuami kum in kum 100 dammi 152 om a, 2008 kum in kum 100 leh atungsie dammi 19769 a om vua, kum 45 sungin kum 100 tunglam damsawtmi 19616 in kibelap uh hi. Leitung ah Japan te kum sawt dam pente in kiciemte hi. Tambanga a damsawt na uh pen a neh a dawn uh leh cidamna dinga a kikep siem zie uh hipen hi. Japan ah mi taan 127.8 (127.8 Million) om uh a, kum 100 val dammi 36346 om uh hi.

Leitung ah Nasep Neilo Mi Kibelap Zel:

Gam khangto pen te ah kum 2007 pan 2010 sung nasem mi taan 30 (30 Million) te in a nasep uh hasua in nasep neilo in om ding uh hi. Tam pen leitung ah sum le pai hamsatna zie a hi ci sumbawl kipawlton pawl (OECD) makai pa in gen hi. (Ref: light of Myanmar)

Leiba Tampi Ba Zel Uh:

Sum le pai kielpi in leitung ah supna a piengsah a, vanlam khuolzinna ah zong supna tampi tun hi. Kum 2008 sungin, lametna za sangin Leitung Khuolzin Kipawltonna (International Airline Cooperation) te in US $ taan 80,000 (8 Billion) supna thuo uh hi. Tami International Airline Cooperation ah Airline 230 kipawl uh hi. Leitung sum kielpi zie in Vanleng tawh mi tawm ma ma a, vanleng ten zng a leen hun ding uh (Flight Schedule) khiemsuh dohta uh hi.

Nasemte Khiem Suh Suh Uh:

Leitung sum kielpi in khantona ding a dal ma ma a, 2008 kumin Vietnam kumpi in a gamsung vua kumpi nasem mi 5% khiemsuh uh hi. 2009 kumkim sung in zong 300,000 khiem in, kumkim nualam ciengin 100,000 khiemsuh kia ding ci uh hi.(Ref: Light of Myanmar)

Ministers’ Conference Om Ding: Kamphen kullo Zomi Pasian nasemte thusintonna (Ministers’ Conference) thupitah in bawl kisawm a, minister mi 600 cieng kisang ding hi. Ahun ding pen October 6-9, 2009 sung hi dinga, Kawlpi Leipi Tuiphum Pawlpi Bieinn kibawl ding hi. Thusin sah ding sie te pen :Rev. Dr. Bishop Felix Lian Khen Thang, Auxiliary Bishop of Hakha Diocease in “Zomi and Ecumenism” hil dinga, Rev. Dr. Do Sian Thang, Principal, ZTC, Falam in “Zomi’s Life and Mission in 21st Century” hil dinga, Rev. Dr. Thuam Khan Thang, Superintendent, Tedim AG Section in “Zomi and Christian Spirituality” hil dinga, Rev. Dr. S. Pau Khan En, Principal, MIT, Yangon in “Zomi and Transformation” hilna nei ding uh hi. Pastor a lunglut te in a vaisai te kung ah kankhol thei hi. Lutman Ks. 2000 hi dinga, an kivah ding hi. Mawtaw sap pen kipia zo lo ding ci uh hi.

M.Th Degree Tawh Vai Hing Tung:

Rev. Awn Sien Mung Thang, Tahan Theological College a sie sem, Zo Synod, in Netherland gam Protestant Theological University ah M.Th a vasin na pan in guolzawna lukhu nelkaipi ang khuh zaw ciengin August 29 ni in Yangon ang tung ta September ni 2 in Kawlpi ang tung hi. Cidama a guolzawna tung ah ih noppi thu ih pulah uh hi.

Dahpina: Pa Suan Gin Hang, Myoma, Tedim in tahsalam damlona ziein August 10 ni in a it angai a innkuonpite leh a Zo mipite nuasie in Pasian kung ah ei peisan ta hi. Ama pen Pasian a it ban ah Zomi, Zolai alaina leh a it ma ma khat hia, Zo Kuom Thawn suohna dingin anei alam tawh pan ei lahpiehpa a hi ziehin Zo Kuom Thawn pan ih dahna thu ih pulah uh hi.

Ngetna:

Zo Kuom Thawn sim zosie te in thapiehnopna, gennop leh thusuo nop na nei uh leh a nuoi a address tawh ei kawm ta un. Kumkhat a ding tatman Ks. 500/ hi a, a tamzaw piete kinuom ma ma ding hi.

Rev. Zam Khan Lam, Chief Editor, Zo Synod Office, 156/15 Pinlong, Bandola Street, Kalay Myo, Sagaing Division, Myanmar. Email: ( This e-mail address is being protected from spambots. You need JavaScript enabled to view it ), Tel.073-21369

Nuomthu Genna: Zo Kuom Thawn suona dingin itna leh lainatna tawh Upa Pau Cin Mang, Kawlpi, Zo Synod in Ks. 1000/, Evangelist Mang Suan Thang, Kanan, Zo Synod in Ks. 1000/ leh Upa Thang Do Lian, Kawlpi, Zo Synod in Ks.1000/ ei pei uh a hi zieh un nuomthu ih tun uh hi.